GRABENG kasuko kay napildi sa Barangay and Sangguniang Kabataan Elections (BSKE) maoy gilantaw karon sa mga awtoridad nga hinungdan sa pagsunog sa eskuwelahan alas 3:00 sa hapon, Martes, Oktubre 31, 2023, sa Buluan, Maguindanao del Sur.
Matud ni Maguindanao del Sur Police Provincial Office Director Colonel Ruel Sermese nga nakadawat sila og taho nga gisunog sa mga armadong mga lalaki ang Lower Siling Elementary School sa Barangay Lower Siling, Buluan sa nahisgutang probinsiya.
Human mahimo ang tuyo, daling nisibat ang mga suspek nga giingong mga suporter sa naparot nga kandidato aron nga di maapsan sa nagsingabot ug nirespondeng mga sundalo ug kapulisan.
Paspas sab nga nahiabot ang mga sakop sa Bureau of Fire Protection (BFP) sa Buluan apan ugdaw na ang eskuwelahan nga gama lamang sa light materials.
Gikanayon ni Buluan Breau of Fire Marshall Senior Fire Officer 2 Musahid Guiam nga nagpadayon pa ang ilang imbestigasyon sa pagkasunog sa tulunghaan.
Apan sa pasiunang pagsusi sa mga pulis, dunay nakita silang mga ebidensiya nga tinuyo nga gisunog ang eskuwelahan base sa nakita sa mga molupyo sa lugar nga dunay mga tawo nga nagdala og mga galon nga posibleng gasolina ang sulod niini.
Gituohan nga posibleng gisunog ang eskuwelahan sa mga suporter sa napilding kandidato.
Kahinumdoman nga duha sab duha ka eskuwelahan ang gidauban una natigayon ang BSKE sa Maguindanao del Norte.