HAGONOY, Davao del Sur -- Usa ka lalaki ang mitunol sa kapulisan sa Hagonoy Municipal Police Station ang kapin 30 ka mga improvised explosive devices (IEDs) nga iyang napalgan sa basurahan, adlaw’ng Huwebes, Enero 9, 2020.
Narekober ang IEDs nga adunay managlahing gidak-on didto sa Phase 2 Relocation sa Barangay Guihing, ning lungsod.
Dali sab nga gihipos sa Explosive Ordnance and Disposal Team (EODT) sa Davao del Sur Police Provincial Office (DSPPO) ang mga eksplosibo aron di makahatag og peligro sa mga molupyo sa lugar.
Gituohang gamiton sa ilegal nga panagat o kaha pagmina ang mga eksplosibo.
Hugot nga gibantayan sa kapulisan ang mga kadagatan sa probinsiya aron di makalusot ang mga mananagat nga nagagamit og mga eksplosibo aron makakuha og daghang isda.
Giawhag sab niini ang publiko nga gilayong motaho kanila ugaling masakpan ang ilegal nga pagpanagat sa ilang lugar gamit ang dinamita. (Orlando B. Dinoy)