DUHA ka mga trabahante sa konstraksiyon ang namatay diha-diha dayon human matagak gikan sa ika-11 nga andana sa gikonstrak nga condominium sa may Buhangin, Davao City bandang alas 2:36 sa hapon, Miyerkules, Hulyo 12, 2023.
Sumala kang Davao City Police Office Spokesperson (DCPO) Police Captain Hazel Tuazon nga mga biktima mga magsuon nga sila si Nolie ug Garry Antoa, pulos lalaki ug hamtong ang pangedaron. Nanarbaho ang mga nahisgutan dinhi sa Davao City apan lumad nga taga Manay, Davao Oriental.
Sumala sa kauban nilang mason nga si Helmer Nersa Samonte, 38, molupyo sa Tambobong, Baguio District, nga samtang silang tulo nagpayl og hollow blocks sa ika-11 nga andanang condominium, ang atop-atop o canopy nga ilang gitungtongan kalit lang nahugno nga niresulta sa pagkatagak nila.
Suwerte nga si Samonte nakahimo pa og lukso padulong sa laing andana apan ang magsuon wala na maluwas pa. Kini niresulta sa kalit nga kamatayon sa mga biktima.
Bisan pa niini, dali silang gihatud ngadto sa Southern Philippines Medical Center apan gideklarang patay na.
