GINASUBAY pa sa kapulisan sa Tugbok Police Station ang background sa babayeng biktima sa ulahing pagpamusil nga natigayon sa Davao City, Miyerkules sa gabii, Disyembre 28, 2022, didto sa Purok 18, Buttercup Street, Corner Bluebell Street, Green Meadows Subdivision, Brgy. Sto Niño, Tugbok District, Mintal.
Sumala sa Tugbok Police Station pinaagi ni Police Captain Jeffrey Grant Bangcas, giila niini ang biktima nga si Yvonette Plaza, 38-anyos, usa ka negosyante ug nagrenta og balay sa nsampit nga dapit.
Subay sa imbestigasyon sa kapulisan, nasayran nga pag-abot sa biktima sa maong lugar, mikanaug kini sa sakyanan nga Montero color puti may plate number LAD 7022, sa dihang moabli na unta kini sa gate kalit miabot ang usa ka lalaki, nakasuot og itom nga sweatshirt ug maong nga pantalon, miduol ug gipusil ang biktima dayon sibat.
Ang bitkima nakahiagom og daghang samad-pinusilan sa lawas nga maoy hinungdan sa hinanaling kamatayon niini.
Wala pa'y matumbok nga suspek ang kapulisan ug ang posibleng motibo sa kremin nga maoy ilang gihimoan karon og makuting imbestigasyon.
Giingon ni Bangcas nga nag-inusara lang ug walay kauban nga pamilya ang biktima sa balay nga iyang gipuy-an.
Padayon pa ang imbestigasyon sa background sa biktima aron nga mahibal-an ang motibo sa krimen diin ang patay'ng lawas niini anaa na sa Angel Funeral Parlor sa Calinan ning siyudad sa Davao.