MAGPET, North Cotabato - Padayon ang combat clearing operation sa militar ug kapulisan batok sa mga rebeldeng ilawom sa Guerilla Front Committee 53 sa New People's Army (NPA) nga nagpabusikad og landmine sa mga nagpatrolyang mga pulis sa Barangay Poblacion sa lungsod niadtong Lunes sa gabii, Enero 28.
Sa maong hitabo, usa ka pulis ang patay samtang laing 11 ang nangasamdan.
Giila ang namatay nga si P01 Christopher Anadon samtang ang mga nangasamdan mao sila SPO1 Michael Mariano Escano, PO2 Marinerl Pastores, PO1 Eliezer Langcuban, PO1 Darrell Ferolino, PO1 Phil Jan Ray Canarejo, PO1 Mark Vincent Capilitan, PO1 Franz Deo Lechago, P01 Darrel Ferolino, P02 Dennis Donado, SPO1 Wilfred Perocho ug PO1 Ian Francis Seniel nga pulos mga sakop sa North Cotabato Police Provincial Mobile Force.
Gikanayon ni Magpet Chief of Police, Senior Inspector Rolando Dillera nga nagpatrolya ang mga pulis sa Purok Kabisig sa nahisgutang barangay gumikan sa giingong presensiya sa mga rebelde.
Apan kalit lang mibusikad daplin sa kalsada ang duha ka landmine nga gitanum sa mga rebelde hinungdan sa pagkaigo sa mga biktima ug pagkaguba sa patrol car nga ilang gisakyan.
Mga samdan daling gipangdala ngadto sa Kidapawan Medical Specialist Hospital apan pipila ka gutlo ang milabay nakabsan sa kinabuhi si Anadon nga naigo sa ulo samtang luwas na ang iyang mga kauban. (Edgar E. Fuerzas)