NANAWAGAN ang usa ka opisyal sa militar ngadto sa publiko nga itaho gilayon ngadto sa awtoridad kon makadawat og "text scams", ilabi na kadtong nalambigit nga mga indibiduwal nga miangkon nga "members of communist groups" ug nangayo og tabang.
“Kami nanawagan na kung naa moy madawat nga extortion, gipangayoan mo [og kuwarta] please report immediately to us 10th infantry division (ID) or any nearest camps ug sa PNP,” awhag ni Major Mark Anthony Tito, 10th Infantry Division (10ID) spokesperson, atol sa AFP-PNP Press Corps press conference Mayo 10.
Kini nahisgutan human gisulti ni Tito nga nakadawat sila og di pa opisyal nga mga taho nga dunay mga tawo kinsa nangayo og tabang gikan sa mga ordinaryong katawhan.
Hinuon, gitin-aw ni Tito nga usa lang kini ka “isolated” nga kaso, ug kon ang 10th ID ang pangutan-on, nakadawat lang sila og “less than three” nga reklamo, gikan tanan sa Davao de Oro.
Dugang ni Tito nga ang mangilkilay mangayo lang og “P300 to P500” tabang pinaagi sa mobile wallet applications.
"Kung ikaw ordinaryong tawo ra ka, wala ka nasuheto og unsa ni nga front, kinsa ni nga commander, ang uban mo-give in,” pagtataw ni Tito.
Apan matud ni Tito ang Davao Region pabiling insurgency-free ug nipasalig nga hangtud karon, wala pay New People’s Army o bisan unsang yunit sa komunista naa sa rehiyon.
Dugang pa niya nga ang 10ID "nagkontrola na sa sitwasiyon" ug karon ug karon padayon ang ilang operasyon aron nga mapabilin ang kaluwasan ug seguridad sa rehiyon batok sa mga grupong komunista.
“This is our effort as much as possible, tanan na mga nag-active, nag-lilow, tanan sila is ma-account nato sila properly sa atong sustainment operations,” pagtin-aw ni Tito.