COTABATO CITY -- Giguba sa armadong grupo ang sub-office sa usa ka lokal nga opisyal alas 8:20 sa buntag niadtong adlaw nga Lunes, Abril 27, sa probinsiya sa Maguindanao.
Gibutyag ni Maguindanao Police Provincial director Colonel Arnold Santiago nga gisulong sa mga armadong kalalakin-an ang sub-office ni Talitay, Maguindanao Mayor Moner Sabal ug girakrakan gamit ang mga tag-as nga matang sa armas.
Gisulod sa mga armado ang buhatan ni Mayor Sabal ug gipangguba ang mga kagamitan.
Misibat sab dayon ang mga suspetsado sa diha nga ilang namatikdan nga nagsingabot ang mga miyembro sa MILF Task Force Itihad.
Walay naangol sa pag-atake sa mga armadong kalalakin-an gumikan bag-o sila miabot nakadagan na ang mga nagbantay sa sub-office ni Mayor Sabal.
Kahinumdoman nga mihulip si Mayor Moner Sabal sa posisyon sa iyang igsoon nga si kanhi Mayor Abdulwahab "Alan" Sabal nga gipusil patay didto sa Malate, Manila.
Sa kasamtangan, ang kapulisan sa Talitay ang padayon nga nag-imbestiga kalabutan sa maong hitabo. (Edgar E. Fuerzas)