USA ka taas nga opisyal sa barangay sa siyudad sa Davao nagbutyag nga tanang mga opisyales sa 182 ka barangay sa dakbayan kinahanglan nga bakunahan una ang Nobyembre 15.
Gikanayon ni Barangay 5-A Bankerohan Captain Edgar Ibuyan Sr., kinsa maoy presidente sa Liga ng mga Barangay-Davao City chapter sa paghinabi sa radyo, nga duna pay mga opisyales gikan sa 29 ka barangay, naglakip sa kapitanes ug kagawad, gitahong wala pa mabakunahi.
Dugang pa niya nga kini naglakip niadtong mga opisyales nga di nila makontak gikan sa hilit nga mga dapit sa dakbayan.
Subling gisulti ni Ibuyan nga tanang mga personahe sa barangay kinahanglan nga makabakuna batok sa Covid-19 aron nga makatampo sa target sa dakbayan sa pagkab-ot 1.2 milyon nga herd immunity.
Giangkon niya nga dunay mga personahe sa barangay kinsa pabiling nagduha-duha sa pagdawat sa bakuna sa Covid-19 bisan pa sa pipila ka bulan human gisugdan ang immunization program sa gobyerno niadtong Marso 5.
Bisan gani si Mayor Sara Duterte-Carpio miisyu og kamandoan nga mga opisyales sa barangay kinahanglan nga manguna sa paningkamot sa pagpamakuna pinaagi sa pagbakuna og una mismo sa ilang kaugalingon aron nga makapadugang sa kompiyansa sa ilang mga ginsakupan.
"Maghimo mi og memorandum... As per advise sa atong Mayor nga kinahanglan ang mga barangay officials nga maoy mag-una [sa vaccination]," butyag ni ibuyan sa paghinabi sa 87.5 FM Davao City Disaster Radio.
Iya sab nga ilakip sa memorandum ang mga miyembro sa Sangguniang Kabataan sa pagkuha og listahan alang sa mga fully vaccinated na ang mga opisyales.
Dugang gibutyag sa presidente sa Liga nga nakadawat sila og kamandoan nga kab-uton ang herd immunity sa barangay una matapos ang Nobyembre.
Tungod niini, ang pagbakuna dad-on na ngadto sa mga purok aron mga tawo di na molinya sa mga vaccination sites.
Kini human nga nabantayan sa lokal nga panggamhanan nga hinay ang dagan sa vaccination drive.
Sukad Oktubre 28, gitaho sa Davao City Vaccination Cluster nga 64.2 porsiyento nga herd immunity alang sa unang dose, kon diin 882,818 ang gihatagan. Samtang 788,001 mga fully vaccinated na human makadawat sa ilang ikaduhang dose.