DIGOS CITY -- Gisugdan na sa kontraktor nga R.G. Salanatin ang konstruksiyon sa P170 milyones nga Digos Business Center nga nahimutang sa Rizal Avenue.
Personal sab nga gi-inspeksiyon ni Mayor Joseph Peñas niadtong Biyernes, Hulyo 13, ang dapit human gitukod na ang mga poste nga gikan pa sa nasud sa Vietnam.
Giklaro ni Peñas nga wala nakaapekto kaniya ang gihimong tumo-tumo nga istorya sa mga bokador ni Governor Douglas Cagas nga dugay nasugdan ang proyekto tungod kay adunay gikalot nga bulawan sa maong dapit.
Matud ni Peñas nga mga lasaw og utok ang nagpasimuno sa maong isyu human nga giingog wala nay mituo nila ug iyang gihulagway nga insecure lang ang kontra niini sa politika human sa daghang kalamboan nga nabuhat sa iyang dakbayan.
"Ilang gi-mention sa ilang radio programs nga nangalot ko'g gold dinhi. This is a project of the local government of Digos, this is for the benefit of Digoseños, and their accusations are baseless," sulti ni Mayor Peñas.
Halos matag adlaw na nga ginabatikos si Peñas sa mga bokador sa iyang kaatbang human nga mideklara kining modagan nga gobernador. Apan matud niya nga wala siya mabalaka niini sangit nasayod siya nga nasayod ang katawhan kon kinsa ang angayang tuhoan.
"I am ready to face the governor in a one-in-one battle for governorship in 2019," tataw ni Mayor Peñas.
Samtang, gisaad sa kontraktor nga gikan bulan sa Septyembre ngadto sa Disyembre karong tuiga ang target nga mahuman ang proyekto.
Dugang sa mayor nga walay bisan usa ka sentimo nga gipaguwa ang dakbayan sa pagtukod sa maong proyekto sanglit unya pa bayaran ang kontraktor kon matunol na kini sa lokal nga kagamhanan. (Orlando B. Dinoy)