NAGMANDO si Pangulo Rodrigo Duterte sa pagsikop sa mga suspek luyo sa linuog nga kamatayon ni Christine Lee Silawan, 16-anyos, estudyante sa hayskol sa Lapu-Lapu City, Cebu.
“Do not destroy my country, either by drugs or by committing rampant criminality, because I will kill you, and do not feed my children and my neighbors’ children with shabu o kung anong drugs man...ecstasy... because I will kill you. And that is a warning to everybody,” sulti ni Duterte nga iyang gibalik-balik matag pamulong.
Sa pamulong sa pangulo didto sa PDP-Laban campaign rally sa Cauayan City sa miaging gabii, giingon niini nga lango sa ilegal nga druga ang mihimo sa pagpanit sa nawong, paglugos ug pagpatay sa estudyante.
Mokantidad sa P2 milyon ang ganti sa makatudlo aron masikop ang suspetsado.
Biyernes sa hapon nasikop si hiniusang puwersa sa otoridad sa Davao City si Jonas Martel Bueno ang giingong suspek sa kamatayon sa dalagita.
Apan gikabutyag sa otoridad nga usa lamang kini ka “person of interest” sanglit dunay susama niini nga hitabo nga si Bueno ang primary suspect sa pagpanit ug pagpatay kang Trinidad Batucan, 60, mag-uuma, taga Danao, Cebu.
Si Batucan gipanitan ang nawong ug dughan. Susama sa nahitabo ni Batucan, si Christine Lee Silawan gipanitan sab ang nawong.
Depensa sa suspek nga si Bueno, “dili ako ang naghimo sa pagpatay sa 16-anyos, pero maangkon nako nga ako ang naghimo sa pagpatay sa 60-anyos didtos Danao,” ingon sa suspek kinsa dunay daghang demonyo nga tattoo sa iyang lawas kinsa giatubang sa mga tigbalita didto sa buhatan sa National Bureau of Investigation (NBI)-Davao, Biyernes sa gabii.
Apan sa bahin sa Police Regional Office (PRO)-Davao gibutyag niini nga dunay dakong posibilidad nga kaubanan ra ni Bueno ang mipatay sa 16-anyos.
Sa gihimong press conference sa NBI, giingon ni PRO-Davao director Chief Supt. Marcelo Morales nga dako ang tyansa nga masayran ug masikop ang mga kaubanan sa pagpatay sa dalagita niining pagkasikop karon ni Bueno.
Tungod sa hitabo, subling nabanhaw ang gihisgutan sa pangulo niadtong 2016 presidential election, diin si Duterte mipasalig nga iyang banhawon pag-usab ang death penalty sa nasud.
Tuig 1993 gipatuman kini sa nasud ubos sa Republic Act 7659, apan pinaagi sa gipanday na sab nga balaud nga RA 9346 kon Law Abolishing The Death Penalty, nawagtang kini tuig 2006. (Jeepy P. Compio)