MAGSAYSAY, Davao del Sur -- Gitunol sa Philippine National Red Cross (PNRC) ang kantidad nga P2,530,500 milyones ngadto sa 723 ka mga biktima sa linog sa Barangay Upper Bala niadtong Biyernes, Enero 31.
Sumala ni PRC-Davao del Sur Chapter Administrator Helen Caberto nga ang cash relief bahinon sa tag P3,500 matag benepisyaryo human gipailawom sa balidasyon sa mga PRC validators ug adunay pagtugot ni PRC Chairman ug Chief Executive Officer Senator Richard J. Gordon.
Matud ni Caberto nga si Gordon unta ang personal nga motunol sa cash assistance apan wa mahinayon gumikan sa mga kakulian.
Gitataw niini nga bugtong ang maong lungsod lamang sa Davao del Sur ang nakadawat sa maong hinabang.
Sa probinsiya sa North Cotabato, nakadawat sab og cash relief ang Kidapawan City.
Samtang gipasalamatan og dako ni Mayor Arthur Davin ang PRC tungod sa way puas nga suporta kanila.
Nasayran nga ang PRC sab ang unang mitunol og hinabang dihang nahitabo ang unang linog sa lugar sa miaging tuig.
Ang mayor miawhag sa mga benepisyaryo nga gamiton ang maong salapi sa pagpamalit sa ilang mga gikinahanglan sa panimalay aron makatabang sa pamilya. (Orlando B. Dinoy)