NANGAYO karon og tabang ang Philippine Eagle Foundation (PEF) ngadto sa lokal nga panggamhanan sa Siyudad sa Davao nga makamuntar og "emergency enclosures" sa Barangay Eden aron nga makabalhin sila sa tulo ka paresan sa agila nga kabahin sa "Captive Breeding Program".
"Mao na among gina-ask karon nga tabang from the City Government kay kailangan unta nga ma-prioritize na sila nga mabalhin sa Barangay Eden kay tungod naa ta'y scare karon sa avian flu," hangyo ni Andi Baldonato, development manager sa PEF, sa paghinabi kaniya sa Davao City Disaster Radio niadtong Miyerkules, Hunyo 8, 2022.
Giklaro ni Baldonato nga bisan og temporaryo lang nga kabalhinan, dako na kaayo og tabang aron nga luwas ang mga agila.
Bag-ohay lang, gisulti ni Baldonato nga nagplano sila nga mobalhin gikan sa Malagos tungod sa mga hulga sa avian flu ug uban pang gikabalak-an nga kontaminasyon tungod sa kakuwang sa buffer zones.
Ang Philippine Eagle Center (PEC) kasamtangang nag-okupa sa walo ka ektarya nga luna sa Malagos. Sa Barangay Eden, tinguha nila nga makamuntar og center sa 50-ektarya nga propedad sa lokal nga panggamhanan. Ang pagtukod og bag-ong center mokantidad og P56 milyon.
Gitin-aw ni Baldonato nga ang pagbalhin sa center importante kaayo tungod kay ang breeding season komplikado.
"Ang mga agila man gud sensitive sila ba, kanang makadungog sila'g saba, ma-disrupt na dayon ilang breeding activities, so di madayon, so mahuman nalang ang season dili sila ka-produce og itlog, so kailangan sila unahon pag-transfer," tug-an ni Baldonato.
Tungod niini, mahimo sab nga makadonar ang bisan kinsa aron nga makatigum sila og pundo alang sa maong katuyoan. Mahimo ipaagi kini sa ilang website sa philippineeaglefoundation.org/donate kon diin makapili og opsiiyon nga maka-donar nga puwedeng iagi sa e-money services ug debit/credit card.