GIKANAYON sa AboitizPower subsidiary Davao Light and Power Company (Davao Light) nga ang P2-kubos sa sa balayranan sa sugang dagitabnon tungod sa kabarato nga nakuha nga power supply.
Sa suwat-pahayag, gisulti sa Davao Light nga ang ilang konsumante makamatikod og pagkubos og P2 sa ilang balayranan sa ilang kuryente tungod sa pagkubos sa generation rate sa bulan sa Oktubre.
Gikan sa P8.0342 generation rate alang sa balayranan sa Septyembre, naa kini karon sa P6.3678 sa Oktubre, hinungdan nga power rate karong bulana naa sa P10.8028 gikan sa P13.0101 sa miaging bulan.
Alang sa yanong pamilya nga dunay average nga binulang balayranan nga 200 kWh, kini mokubos ngadto sa P441 gikan sa kanhi balayranan.
Gitin-aw ni Davao Reputation Enhancement Department Manager Fermin Edillon ngadto sa SunStar Davao sa paghinabi sa telepono Lunes, Oktubre 17, nga nakahimo sila og pangita og dugang power supply gikan sa National Power Corporation (NPC) ug Power Sector Assets and Liabilities Management Corporation (PSALM), nga mas barato.
"Kana siya nga reduction, kon imo na tan-awon for a typical household with an average monthly consumption of 200 kilowatt-hour, this will be a reduction of P441 from the previous bill nila," pagklaro niya.
Dugang giklaro sa Davao Light sayo niini ngadto sa mga konsumante nga ang power rates nga nabati sa miaging Hunyo tungod sa pagtaas sa generation rate isip resulta sa pagtaas sa presyo sa giimportar nga lana, ilabi na ang karbon. Ang taas nga energy demands ug ang padayong away tali sa Russia ug Ukraine, ug uban pa, nakatampo sa pagtaas sa presyo sa lana.
Nagdasig ang Davao Light ngadto sa ilang mga konsumante nga padayong magdaginot sa paggamit sa elektrisidad. Usa ka paagi nga makubsan ang energy consumption mao ang paglimita sa paggamit og "heating and cooling devices" ug mga aplayanses nga mokaon og taas nga enerhiya.