KIDAPAWAN CITY -- Away sa pamilya nga gilantaw nga motibo sa mga awtoridad sa pagpabusikad og granada ala 1:10 sa kaadlawon, Lunes, Agosto 14, 2023, sa Kabacan, probinsiya sa Cotabato.
Atol sa hitabo, tulo ka mga tawo ang naangol nga giilang sila Wadzere Anoc Salasal, 48, asawa niya nga si Norma, 50, ug apo nga si Amanie, 6, ug molupyo sa Sitio Lumayong, Barangay Kayaga, Kabacan sa nahisgutang probinsiya.
Gibutyag ni Cotabato Provincial Police Office Director Colonel Harold Ramos nga giitsahan og granada sa duha ka wala mailhing lalaki ang tindahan kung asa natulog ang mga biktima.
Mga suspek dali sab nga miikyas paingon sa direksiyon sa Maguindanao del Sur.
Gisapupo ang mga biktima sa mga nagresponde nga mga sakop sa Municipal Disaster Risk Reduction and Management Office (MDRRMO-Kabacan) ug gidala ngadto sa balay tambalanan nga giingong talandugon ang kahimtang.
Mga nagresponde nga mga sakop sa 33rd Explosive Ordnance Disposal Team sa Philippine Army, narekober ang safety lever ug pin sa MK2 fragmentation grenade ug usa pa ka granada nga wala makabuto.
Kapulisan sa Kabacan Municipal Police Station padayon pa sa gihimo nilang imbestigasyon sa hitabo.