GIPAHIBAWO sa Durian Industry Council of Davao City (DICDC) nga ang tingpupo sa duryan mas sayo karong tuiga nga gibanabana nga mahitabo sa Agosto atol sa Kadayawan.
Apan gitin-aw nga gilauman nga ubos ang produksiyon tungod sa hulaw.
Si Larry Miculob, presidente sa DCDIA, nagsulti atol sa Kapehan sa Dabaw kagahapon sa SM City Annex building nga dunay daghang mga bulak ang duryan human sa Bagyong Chedeng ug mga katag-katag nga ulan sa siyudad.
"The good news is that, our durian season might be early this year. It would fall during August. Yan ang expectation namin. Ang durian papasok sa August, panahon ng Kadayawan, expect a lot of durian. On the other hand, the production might go down this year," tin-aw niya.
Apan, ang ilang gikabalak-an karon mao ang posibleng epekto sa El Niño bisan tuod kon ang Davao City wa kaayo makaapekto tungod kay nasinati pa gihapon ang ulan apan tungod sa kaigang sa temperatura, duna kini epekto sa produksiyon tungod ang punoan sa duryan wala pa makarekober ug karon ang hulaw.
"Hopefully ang expectation namo kung magpadayon ni ug El Niño, although we are not so affected here in Davao, pero medyo taas-taas gihapon ang init. Ang amo man gud dapat makarecover ang punoan, maka-fertilize ang mga farmers aron dali maka-recover," dugang pa niya.
Niadtong milabay nga tuig, iyang gitaho nga dunay taas nga produksiyon sa duryan apan naobserbahan nga gamay lang ang niabot sa merkado. Kini tungod matud pa sa tulo ka processors nga nisulod sa Davao City kon diin
ang target market alang sa export ug taas nga demand sa Manila, hinungdan, ang sirkulasyon sa lokal merkado nikubos.
Sa dakbayan sa Davao, mga 3,000 ka ektarya sa yuta ang gitamnan og duryan. Apan tungod sa pagtaas sa panginahanglan sa merkado, ang produksiyon di na paigo tungod kay way ekspansiyon may kabahin sa land area. Iyang gidasig ang mga mag-uuma nga mananum og duryan tungod kay potensiyal kini.
"So we are encouraging even diri sa Davao City to expand at least 1,000 hectares every year para sa atoang production," dugang pa niya.
Ang dakbayan sa Davao maoy pinakadako nga prodyuser sa duryan, nagsuplay og mga 80 porsiyento sa kinatibuk-ang produksiyon sa Pilipinas.
"Ang direction man god namo sa durian industry, we will no limit for the Davao City, we would like to see na ang durian industry will expand in the whole Mindanao because dili man ta maagian ang Mindanao so we should capitalize on this opportunity for the other farmers lalo na sa BARMM area," pagklaro niya. (JCR)