NAGTIGOM na ang lokal nga panggamhanan sa Pikit, North Cotabato sa pagpanguna ni Mayor Sumulong Sultan, uban ang mga militar ug kapulisan aron nga resolbahon ang giingong sunod-sunod nga insidente sa pagpamusil sa lungsod.
Pinakaulahing insidente sa pagpamusil natigayon alas 2 sa hapon niadtong Huwebes, Pebrero 16, kon diin usa ka 14-anyos nga estudyante ug laing usa ka lalaki nga giingong paryente og politiko naangol.
Giila ang mga biktima nga sila si alyas Jammer, paryente sa usa ka politiko ug si alyas Justine, 14-anyos nga estudyante.
Matud ni Pikit Chief of Police Lieutenant Colonel John Miridel Calinga nga mga biktima sunod-sunod nga gipamusil sa wala mailhing mga suspek didto sa Barangay Poblacion sa lungsod sa Pikit.
Mga biktima daling gihatud ngadto sa Cruzado Medical Hospital sa Pikit apan gibalhin sa dakong balay tambalanan sa Siyudad sa Kidapawan.
Tungod niini, nabalaka karon ang mga molupyo sa Pikit sa sunod-sunod nga panghitabong pagpamusil sa ilang lugar.
Kahinumdoman nga niadtong Pebrero 14, usa ka 13-anyos nga lalaki ang gipusil-patay sa wala mailang mga suspek.
Hinuon, padayon ang kapulisan sa Pikit Municipal Police Station sa ilang imbestigasyon aron nga matumbok sa madaling panahon ang mga suspek sa bag-ohay lang pagpamusil sa lungsod.