NILUSAD na ang Commission on Human Rights (CHR) og ilang kaugalingong imbestigasyon nga may kalabutan sa giingong pagmaltrato sa 16-anyos nga lalaki sa Don Marcelino, Davao Occidental gikan sa tulo ka mga pulis pinaagi sa pagbubo og suka ug sili sa kinatawo sa menor.
Subay sa taho, ang menor de edad midangop sa police station aron nga itaho ang pagpangabusong pisikal nga iyang nasinati sa mga kamot sa iyang amahan.
Inay nga makakuha og tabang nga iyang gikinahanglan, ang tulo ka mga pulis giingong nagdala sa biktima ngadto sa ngiob nga lawak, nibubo og solusyon sa suka ug sili sa iyang pribadong parte ug giingong nagsulti kaniya nga magpakahilom sa insidente.
“Gisulod ko nila sa kuwarto gipalong ang suga, gisilihan nila akong kinatawo di pa daw ko nila paulion kay dugangan pa daw nila ana ko ayaw na kay sakit na kaayo. Gipagawas ko nila niadto ko sa bomba (tubigan), nanghugas ko didtoa kay hapdos na kaayo,” saysay sa biktima gikan sa taho sa GMA's One Mindanao.
Matud sa menor nga ang pulis nagpahimangno kaniya nga dili mosumbong bahin sa insidente.
Gikanayon sa CHR nga ang ilang buhatan "expresses grave concern" sa gitaho nga giingong "police abuse and cruelty."
"As duty-bearers who must 'serve and protect' the people, including vulnerable individuals, such as minors and service workers, it is expected that police officers exercise their authority in accordance with the rules and standards required of public officers. Respecting the rights and dignity of individuals is a basic requirement in the conduct of their duty," subay sa pahayag sa komisyon.
Gipasalig hinuon ni Don Marcelino Police Chief Captain Arvin Ongcay nga mopasaka sila og kaso batok sa mga pulis nga responsable sa pag-abuso.
“Gisubay nato ning tanan ba nga pulis ang nagbuhat, kung tinuod, atong tumbukon kung kinsa nga pulis aron pasakahan nato og kaso kay naa pa ta sa pagsubay kung tinuod ba,” pasalig ni Ongcay.
Samtang sa paghinabi sa Kapuso Mo, Jessica Soho, gisulti sa pulis nga ang giakusahan nga pulis nanghimakak sa akusasyon sa menor.
"Sabi din daw na-trigger din daw yata ang police kasi, sa harapan daw nila, sinabihan sila ng bata na 'patayin kita!' Pero hindi natin ito tino-tolerate," matud niya.
Ang biktima kinsa nahinabi sab sa news magazine show, nihimakak sab sa sulti sa pulis.
Si Lenel Ong, Don Marcelino Municipal Social Welfare and Development officer, kinsa kasamtangan nga naggunit sa psychological intervention sa menor, nagkanayon nga ang tulo ka mga pulis girelibohan na.
Matud ni Ongcay nga ang akusado nga pulis kasamtangang gipailawom sa kustodiya sa Davao Occidental Provincial Police Office samtang nagpadayon ang imbestigasyon.
Sa dihang gisulayan sa SunStar Davao sa pagkuha og habig ang Police Regional Office-Davao Region (PRO-Davao) bahin niini, wala pa sila motubag samtang gisuwat kining balita.
Apan base sa pahayag sa CHR, ang PRO-Davao "welcomes the action to file criminal and administrative charges against the three police officers." (Uban sa taho ni JPC)