M'LANG, North Cotabato-- Patay ang Brigade commander sa Moro Islamic Liberation Front human giatngan ug gipaarakan alas 7:50 sa buntag niadtong Dominggo, Pebrero 17.
Ang napatay mao si Jun Pananggulon, Brigade commander sa 108th Base Command sa MILF.
Samtang samdan sab si Toto Magulayan, molupyo sa Barangay Gaunan, M'lang.
Nasayran gikan sa taho North Cotabato Police Provincial Office nga miadto si Pananggulon sa plantasyon sa saging sa Purok 3, Barangay Gaunan sa M’lang sakay og motorsiklo.
Apan duna na’y nag-atang kaniya nga mga armadong lalaki ug gipaarakan siya.
Patay on the spot si Kumander Jun nga natusak-tusak sa bala samtang grabe ang kahimtang ni Magulayan nga nadala sa M'lang District Hospital.
Gituohan nga rido ang motibo sa pagpatay sa biktima apan mga awtoridad padayon pa sa ilang imbestigasyon.