KIDAPAWAN CITY -- Laing upat na sab nga sabongero nga taga Pigcawayan, North Cotabato nadakpan sa mga awtoridad atol sa gilusad nga ronda alas 3:00 sa hapon, Lunes, Marso 8.
Giila ang mga suspek nga sila Raffy Sabpar, Junie Managkil, Arnel Magbanua nga taga Barangay Renibon ug Robert Seguinte nga molupyo sa Poblacion 3.
Sumala kang Pigcawayan Chief of Police Major Ivan Samoraga nga nakadawat sila og impormasyon sa mga nagsabong-sabong sa Sitio Tungano, Barangay Renibon sa maong lungsod.
Busa daling giambakan sa mga pulis ug mga miyembro sa Barangay Peacekeeping Action Team.
Dakpan ang upat ka mga nahisgutan samtang ang uban nakadagan ug nakaipsot.
Narekober sa mga pulis ang 13 ka motorsiklo, lima ka manok panabong ug P890 nga pusta.
Usa sa mga nadakpan nag-ingon nga sila wala managan atol sa ronda gumikan wala sila magsabong ug igo ra nga nagtan-aw.
Sa kasamtangan, gibalhog na ang mga suspek sa selda sa Pigcawayan Municipal Police Station ug gitakda nga pasakaan og tukmang kaso. (Edgar E. Fuerzas)