PADAYON pang giimbestigahan sa mga awtoridad ang pagpusil patay sa 15-anyos nga lalaki sa wala pa mailhing mga suspek didto sa Purok Santan, Brgy. Bincungan, Siyudad sa Tagum sa alas 7:10 sa gabii, Martes, Setyembre 22, 2020.
Giila ang biktima nga si Zaldy Soro Tobato, ulitawo ug molupyo sa Purok Ratan, Barangay Bincungan sa nahisgutang siyudad.
Subay sa report, ang biktima padung nga mopauli sa ilang balay ug samtang naglakaw sa ngitngit nga bahin, mibutho sa dalan ang duha ka wala mailhing suspek nga nag-angkasay sa single nga motorsiklo. Sa way daghang istorya, gipusil sa nakaangkas nga suspek ang biktima tumong sa nagkadaiyang parte sa lawas.
Human sa gihimong pagpamusil, nagdaling nangagiw paingon sa wala masayring direksiyon ang mga suspek.
Gidali pagdala ang biktima sa Davao Regional Medical Center sa pamasin nga masalbar pa ang kinabuhi apan gideklarang dead on arrival sa doktor nga mihiling kaniya.
Narekober gikan sa crime scene ang tulo ka mga basiyo sa bala sa kalibre .45 nga pistola.
Motibo sa krimen, lakip ang matuod nga bansagon sa mga suspek, gisusi pa sa kapulisan sa Tagum City Police Station sanglit nagpadayon pa ang imbestigasyon.