MAGSAYSAY, Davao del Sur -- Naghinam-hinam na ang mga apektadong mga pamilya sa linog nga makabalhin sa permanenteng pinuy-anan sa Barangay San Miguel human aduna nay giandam nga relocation site ang lokal nga gobyerno.
Nabayran na sa Rotary Club International ang 2.1-ektaryang luna sa sentrong bahin og kantidad P2 milyones.
Pagatawgon kini nga "Rotary Village" aron papuy-an sa 62 ka mga pamilyang nawad-an og mga balay human mitay-og ang kusog ug sagunsong linog sa uwahing mga bulan sa 2019.
Niadtong Huwebes sa hapon, Pebrero 6, gibisita sa mga opisyal sa organisasyon ang lugar, kuyog ang mga opisyal sa 39th Infantry Battalion (IB) sa Philippine Army, uban si Mayor Arthur Davin.
Sumala ni Davin nga kutob lang sa Pebrero 14 ang pagpangita og kontraktor sa luna ug human niini, pagasugdan na ang pagtukod sa mga balay nga gama sa semento ug kalakat.
Samtang si Lieutenant Colonel Geoffrey Carandang nagbutyag nga nabayran na sa Armed Forces of the Philippines ang relocation site sa Barangay Upper Bala apan ang National Housing Authority maoy mopatukod og mga balay.
Gikalipay ni Davin ang paspas nga pagtabang kanila sa nagkadaiyang ahensiya sa gobyerno ug mga pribadong organisasyon.
Sa kasamtangan, matag adlaw nga ginabisita sa mayor ang mga biktima sa linog aron ipabati kanila nga hinay-hinay nang mibangon ang lungsod human gilampurnas sa kalamidad. (Orlando B. Dinoy)