MATALAM, North Cotabato -- Personal nga bangi ang gituohang motibo sa mga awtoridad sa pagmasaker sa usa ka pamilya alas 6:45 sa gabii niadtong Dominggo, Enero 5, 2020.
Mga napatay mao sila Ernesta Gatella, 70; Lorena Gatella, 43; ug Joe Gatella, 70; samtang mga samaran mao sila Emmelita Gatella, Jose Gatella ug Darryl Gatella, nagpuyo sa Purok Sampaguita, Barangay Poblacion sa nahisgutang lungsod.
Gibutyag ni Lieutenant Colonel Bernard Tayong, tigpamaba sa North Cotabato Police Provincial Office (CPPO), nga nagkaon ang mga biktima sulod sa balay sa dihang kalit lang nitungha ang tulo ka wala mailhing mga tawo ug dayong nagpaarak og mga bala sa M16 Armalite kon diin dali sab nga niikyas sakay og motorsiklo paingon sa hilit nga dapit sa lungsod.
Patay on the spot sila Ernesta, Lorena ug Joe human matusak-tusak sa mga bala ang mga lawas, samtang gihatud sab ngadto sa Midway Hospital ang laing tulo nga samdan.
Gikanayon sa mga silingan sa mga biktima nga nakadungog sila nga dunay naglalis sulod sa balay sa mga biktima unya dunay misinggit ug nangayo og tabang dungan mga buto sa armas.
Hinuon, ang kapulisan sa Matalam Municipal Police Station duna nay mga person of interest nga giimbestigahan aron nga mahatagan og kasulbaran ang krimen. (Edgar E. Fuerzas)