ISIP ayuda sa katawhan labi na sa ubos nga sektor sa pamuyo luyo sa pagpatuman sa enhanced community quarantine (ECQ), si Davao City First District Representative Paolo Duterte nang-apud-apod og tag P3,000 cash assistance ngadto sa mga traysikad drayber.
Sumala sa kongresista nga anaa sa 2,235 ka mga trisikad drivers sa unang distrito ning siyudad gikan sa 54 ka mga barangay ang nahatagan og ayuda gikan sa congressional office niini.
Mokabat na sa P6.7 million cash assistance ang naapod-apod ni Duterte nga nagsugod niadtong Miyerkules sa miaging duha ka semana diin gawas sa salapi, naa sab gihatag nga food packs alang sa mga trisikad drivers.
Nanghatag sab ang kongresista og mga food packs ug cash assistance sa mga mangaritonay ug mga laborer sa palengke sa Bankerohan ug ang pang-apud-apod og mga relief goods sa mga residente sa Baybay, Purok 1, Zonta, Barangay 23-C Isla Verde, Davao City.
Gawas niini, ang buhatan sab sa batan-ong Duterte nang-apud-apod og mga bugas ug pipila ka mga food assistance sa mga nagkadaiyang orphanages, homes for the aged, ug uban pang health care institutions sa Davao City.
Pipila sa mga identified beneficiaries mao ang Living Stone Orphanage, Love for the Children, Padre Pio Home for the Children, SMAC Sisters, Child Hope Field of Dreams, Pang-amoma, Davao School for the Blind, Care for Elderly, Golden Haven, Good Shepherd, Rimeon Haven Homecare Nursing, Happy Hearts Caring Hand, Davao Serenity Spring, Country View Asstd. Living, St. Therese Senior, ug daghan pang uban.
Daghan sab nga mga barangay ang nakadawat og mga foodpacks ug mga tibuok manok (dressed chicken) sama sa Bucana 76-A, Talomo, Barangays 1A, 2A, 5A, Gravahan, 40, ug Catalunan Grande.
Bisan sa mga probinsya sa Davao Region nakadawat sab og donasyon gikan kang Representative Duterte pinaagi sa donasyon sa higala niini sa nasud China diin two million ka mga face masks ug 1,000 thermal guns ang nahatag sa lima ka mga probinsya.
Malampuson sab nga namontar ang tulo ka mga epidemic and sanitizing stations sa Davao City nga mo-detect sa tawo nga dunay taas nga temperatura. Gilauman sab ang pag-abot sa walo pa ka mga sanitizing stations nga dunay 10 high-tech IR236 Fever Warning System equipment.
Tungod niini, walay kabutangan sa pagpasalamat sa katawhan sa ayuda nga hatud ni Representative Duterte sa iyang distrito luyo niining nasinati karon nga krisis dala sa coronavirus disease (Covid-19).