GISUBAY na ang kuha sa closed circuit television (CCTV) camera sa dapit diin asa natigayon ang giingong pagpanghimulbol sa napulo ka mga bayot sa giingong usa ka pastor alas 10:15 sa gabii, Huwebes, Oktubre 10, 2024, sa Padre Gomez Street, corner Mabini, Davao City.
Kini subay sa blotter nga natala sa San Pedro Police Station human gipa-blotter sa usa ka alas Marco, 45-anyos, lumad nga taga Zamboanga City kinsa giingong mibisita sa dakbayan sa Davao.
Gisaysay sa reklamante nga gituktok suma pa ang iyang kuwarto sa hotel nga iyang gi-check-in-nan sa grupo sa mga binabaye.
Sumala pa nga nagpaila ang mga binabaye nga sila kuno gi-hired sa reklamante, apan miingon ang reklamante nga wala kuno siya nag-hired og masahista.
Dihang mibalibad ang nasampit nga reklamante, gipugos og kuha ang cellphone niini ingon man pabayron kuno siya sa taxi nga ilang gisakyan.
Gilayong nanagan ang mga nahisgutan pagawas sa hotel ug gilayong nanakay ang mga binabaye sa traysikel nga naghulat sa gawas sa hotel.
Wala na naabtan sa guwardiya ang mga binabaye, hinungdan nga nagpa-blotter na lang ang reklamante sa San Pedro PNP kinsa labihan niining kadismaya sa nahitabo kaniya.
Sumala ni Davao City Police Office (DCPO) spokesperson Police Captain Hazel Tuazon nga gipanubayan na sa kapulisan sa San Pedro PNP ang hitabo.
Butangan na sab og mga pulis ang dapit luyo sa giingon nga dunay mga nangreklamo gumikan kung anaa na sa alas 10 sa gabii hangtud alas 4 sa kaadlawon daghang binabaye ang mag-istambay sa dapit.
“Ginapanubayan na nato kini nga incident, in fact ang atong PS-2 kining San Pedro Police Station gisubay na nila ang CCTV footage para maila nato ang mga responsable, and ginapabutangan na sab nato og mga pulis ang dapit, labi pa dunay reklamo nga atong nadawat nga naay daghan mga binabaye nga mag-istambay sa dis-oras sa kagabhion sa dapit, panubayan nato unsa ilang mga aktibidad,” ingon ni Tuazon sa Superbalita Davao, kagahapon.
Giingon sa DCPO nga isolated cases lamang kini nga hitabo. (JPC)