DAVAO DEL SUR -- Lima na ka mga tawo ang namatay sa magnitude 6.9 nga linog sukad alas 9 sa buntag, Lunes, Disyembre 16, kon diin grabeng naapektuhan ang probinsiya.
Ang pinakaulahi, mao ang duha ka mga patay nga lawas nga natanggong sa nahugno nga tulo ka andana nga gambalay sa Southern Trade sa Padada, Davao del Sur, kini subay sa gibutyag ni Provincial Information Officer Hiru Gustavo Undalok.
Matud ni Undalok nga sa taho sa Provincial Disaster Risk Reduction Management Office (PDRRMO), ang unang patay nga lawas naugkat mga alas dos sa kaadlawon ug ang laing usa narekober mga bandang alas otso sa buntag, Lunes.
Gibutyag ni Mayor Pedro Caminero nga mokabat na sa 24 ka tawo ang naangol sa duha ka mga gambalay nga nahugno nga mao ang merkado publiko ug tulo ka andana nga Southern Trade Commercial Building.
Samtang giingong dunay usa ka 73-anyos nga ginang ang wala na igkita human nag-grocery nga giingong apil sa unom ka mga tawo nga gituohang na-trap sa commercial building.
Sa Barangay Limonso sa susamang lungsod, dagkong liki sa yuta ang nakita nga nilahos padung sa merkado publiko.
Hinuon, giingong wala nay namatikdan ang life detector machines nga mga sinyales nga duna pay buhi ilawom sa nahugno nga gambalay, sukwahi sa nikatap nga istorya nga dunay nakateks pa nga biktima nga buhi pa sa ilawom nga bahin. Apan daghan gihapong naglaum nga duna pay maugkat nga buhi ilawom sa mga nahugno nga gambalay.
Gilantaw karon sa mga awtoridad nga dunay liquefaction o nihumok ang yuta hinungdan nga nahugno ang gambalay, ilabi na nga wa kini maunsahay sa tulo ka kusog nga linog niadtong Oktubre.
Niadtong Dominggo sa gabii, gitaho sa Mines and Geosciences Bureau (MGB)-Davao Region nga usa ka tawo ang namatay gikan sa lungsod sa Hagonoy.
Sayo niini, gikataho sab nga namatay ang sais anyos nga batang babaye nga giilang si Cherbelchen Imgador sa Barangay Asinan sa Matanao.
Samtang si Matanao Mayor Vincent Fernandez nasubo bahin sa distruso nga dala sa linog ngadto sa mga inprastraktura ug sa bata nga namatay. Gikanayon ni Fernandez nga halos tanang 33 ka barangay nagtaho nga ang ilang mga barangay hall, gyms, health centers ug pipila ka mga balay ang nahugno.
Iyang gibutyag nga ang gambalay sa buhatan sa lokal nga panggamhanan sama sa municipal hall, buhatan sa Municipal Disaster Risk Reduction Management Council, ABC hall, buhatan sa senior citizen ug ang gambalay sa Land Bank satellite nakaangkon og dakong damyos.
Gisulti sa mayor nga pipila ka mga sementadong dalan nakaangkon og mga liki, ug duna say mga pagdahili sa yuta nga nahitabo sa hilit nga mga barangay.
Ubang mga barangay opisyal nagreklamo sab nga nalubog ang ilang mga mainom nga tubig tungod ang water systems nga nadaut ug pipila nitaho nga ang tinubdan sa ilang tubig nihubas.
Usa sab ka sakyanan nga nakaparada ang nalumping human nahagbongan og mga semento gikan sa ibabaw nga bahin sa St. Benedict Hospital.
Natumpag sab ang Dalapo-Rudinas Hospital sa lungsod mao nga gipagawas ang mga pasyente.
Sa Hagonoy, dili na magamit ang Clinica Rudinas nga usa ka Infirmary Hospital sa Barangay Poblacion human dunay dagkong liki sa sulod ug gawas sa gambalay. Nagtulda na lang sa gawas sa ospital ang mga pasyente.
Sa Bansalan, patay ang senior citizen nga si Elias Degamon human nadat-ogan sa nahugmak nilang balay sa Sitio Kadenas, Brgy. New Clarin.
Sa pagsuwat ning balita Lunes, wa pa masuta ang kinatibuk-ang damyos lakip ang ihap sa mga biktima sa linog sa tibuok Davao del Sur.
Nahitabo ang kalamidad samtang padayon pang nag-rekober ang probinsiya sa tulo ka sagunsong linog niadtong Oktubre.