GIBANA-BANA nga moabot sa P220 milyon kantidad sa mga kahimanan ug yunit sa mga behikulo alang sa urban search and rescue (USAR) gidispatsar ngadto sa Provincial Disaster Risk and Reduction Office (PDRMMO).
Gikanayon ni PDRRM Officer Glenda Delideli nga ang maong mga kahimanan makatabang sa pagbansay nga ilusad sa USAR ug ang aktuwal nga rescue operations sa maong buhatan.
Ang buhatan nagmugna na sa ilang USAR Team bisan sa wala pa ang maong mga yunit sa kahimanan nga gipundohan pinaagi sa kongresiyonal nga buhatan ni Representative Pantaleon Alvarez ug nahatud alang sa aktuwal nga paggamit. Naglusad og laing pagbansay sa USAR gamit ang kompletong mga himan.
Nagkuha ang PDRRMO og mga eksperto gikan sa 911 sa Davao City aron sa pagbalhin sa kahibawo ug abilidad kon unsaon paglusad og rescue operations sa nahugno nga gambalay, unsaon pag-ugkat ang lawas sa tawo por-in-kaso sa mga aksidente sa kadalanan, ug uban pang malisud nga pagdumala og rescue operations.
Gikonsidera ni Delideli ang mga yunit sa USAR nga krusiyal sa mga aksidente sa kadalanan, ilabi nga nagakahitabo kasagaran sa mga highways nga nagsumpay sa Tagum City, Davao del Norte ngadto sa mga kasikbit nga mga probinsiya sa Davao de Oro ug Davao Oriental.
“Ang Davao Del Norte is sentro siya, padulong sa (Davao) Oriental, padulong sa (Davao) De Oro, ug padulong sa Davao City. Mosugot ta’g sa dili, diri kasagaran mahitabo ang dunay mga car accidents,” tataw niya.
“So, dapat nato i-equip ang atong mga responders, alang sa pagtabang kay kita man ang naga augment kung unsa ang kakulangon sa mga LGU’s,” dugang pa niya.
Uban sa advanced rescue nga kahimanan, ang PDRRMO makaabag na og tabang ngadto sa laing mga LGUs ilabi sulod sa probinsiya, ug sumala ni Delideli, “twinning agreement” dako og tabang aron nga ihingpit ang pormal nga panagkumboya sa rescue operations.
Gawas sa abilidad sa mga personahe sa USAR ug himan, gilakip sa PDRRMO ngadto sa ilang sistema ang water search and rescue (WASAR), ug gibansay kadtong molakip sa USAR sa WASAR, matud ni Delideli. (PIA-Davao)