Pickup nabuthan og ligid, nahug sa pangpang; 5 angol

Pickup nabuthan og ligid, nahug sa pangpang; 5 angol
(Hulagway iya sa Sultan Kudarat Police)

NALANDIG sa balay tambalanan ang lima ka tawo sa dihang nahulog sa pangpang ang ilang gisakyan nga pickup alas 2:25 sa hapon, Dominggo, Hunyo 2, 2024, sa Sultan Kudarat, probinsiya sa Maguindanao del Norte.

Giila ang mga biktima nga sila si Zuharto Abdul, drayber sa pickup ug mga sakay niini nga sila Khasmir Kamid, Bai Zaida Abid, Maria Kamilan ug Elsie Acon, kinsa pulos taga Cotabato City.

Gibutyag ni Sultan Kudarat Chief of Police, Lieutenant Colonel Esmael Madin, nga lulan ang mga biktima sa usa ka kolor puti nga Toyota D4D pickup sa Cotabato-Lanao-Davao Road gikan sa Parang, Maguindanao del Norte.

Apan pag-abot nila sa likuon nga bahin sa national highway sa Barangay Rebuken, Sultan Kudarat, Maguindanao del Norte, kalit lang mibuto ang unahan nga bahin sa likod sa pickup.

Wala na makontrolar sa drayber ang manobela ug diretso nga nahulog sa pangpang.

Gisapupo ang mga biktima sa mga nakasaksi sa dapit ug gidala ngadto sa Cotabato Regional and Medical Center (CRMC) sa Cotabato City.

Giingong pagsulat ning balita, anaa sa talandugong kahimtang ang mga biktima ug padayon pang giatiman sa mga doktor.

Nanawagan ang Sultan Kudarat Municipal Police Station sa mga nagmaneho og sakyanan nga maghinay-hinay ug mag-amping aron malikay sa disgrasiya. (EEF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph