Political jingles sa Davao del Sur gireklamo

DAVAO DEL SUR -- Mialma ang ubang netizens diin gipahungaw sa social media ang ilang aligutgot sa lanog nga mga political jingles ilabi pa sa mga subdivision nga madunggan gikan alas 5:00 sa sayong kabuntagon ug bisan sa kagabhion.

Mas madoble pa ang kasaba kun mag-abot ang mga sakyanan nga nagdala og mga trumpa sa usa ka lugar.

Pinaspasay na ang mga kandidato sa ilang kampanya samtang nagkaduol ang midterm elections sa Mayo 13.

Sumala sa netizen nga si Floramae, matugaw ang ilang pagkatulog tungod kay sayo pa lang sa buntag, naglibot-libot na ang sakyanan nga aduna'y political jingle sa ilang lugar.

Ang netizen nga si Sheila Siarez, nagbutyag nga angayang magbaton og kaikog ang mga kandidato pinaagi sa dili pagsayo og rekorida.

Nasayran nga wa'y balaod ang Commission on Elections (Comelec) nga nagdili sa mga rekorida sa mga kandidato apan mahimo kining ma-regulate sa mga opisyal sa barangay.

Gibutyag ni abogada Reyn Joy Bullecer, Comelec officer sa Bansalan, Davao del Sur, nga mahimong ma-regulate sa mga opisyal sa barangay ang distorbo niini.