LUYO sa nagpadayong giatubang sa nasud nga kakuwang sa milled sugar nga nakaapekto sa produksyon sa softdrinks, nabalaka ang mga namaligya tungod kay ang pag-access sa suplay niini magbutang sa peligro sa ilang panginabuhi.
Niadtong Agosto 16, 2022, ang nanguna nga mga tighimo og ilimnon sa nasud: Coca-Cola Beverages Philippines Inc., Pepsi-Cola Products Philippines Inc. ug ARC Refreshments Corp, mikompirmar nga adunay kakulang sa premium nga refined sugar, usa ka importanteng sangkap sa kadaghanan sa ilang mga produkto.
Si Virgie Estrada, tag-iya sa sari-sari store, nitug-an sa SunStar Davao niadtong Martes, Agosto 23, 2022, nga ang iyang tindahan nakasinati og inconsistency sa paghatod sa softdrinks gikan sa ilang mga suppliers sa miaging buwan.
"Usahay ma-short mi sa among baligya. Usahay ang makumpra lang namo sa among supplier kay litro ra, usahay ang baligya ra kay eight ounce," ingon ni Estrada.
Nahibawo siya nga nihit ang suplay sa milled sugar sa nasud nga nakaapekto sa produksiyon sa softdrinks.
Tungod niini, nabalaka siya nga maapektuhan ang iyang halin sanglit usa sa mabaligya sa iyang tindahan ang softdrinks.
"Lugi gyud ta ani, kay wa naman tay ikabaligya," dugang ni Estrada.
Gikahinabi usab sa SunStar Davao ang pipila ka mga tag-iya og sari-sari store, ug susama usab sila og problema.
Si Kiko, usa ka tindera nga dili magpaila, niingon nga nabalaka usab siya sa problema sa suplay sa softdrink.
"Isa na sa mga ginapangita sa mga nagakaon sakong isawan. Lisod kung mahutdan tag supply sa softdrinks. Mas lami man gyud ipares nang mantikaon nga pagkaon," ingon ni Kiko.
Sa laing bahin, nikatap sa internet ang mga litrato niadtong Lunes sa hapon sa usa ka tarpaulin nga gi-post sa gawas sa Coca-Cola Plant sa Ulas Davao City, nga adunay mga pulong, "This Coca-Cola Plant has suspended operations due to the lacl of supply of bottler's grade sugar, as a result of the ongoing sugar crisis."
Pagkasunod adlaw, gitangtang na ang tarpaulin, sumala sa mga taho gikan sa mga lokal nga media outlet.
Ang SunStar Davao naningkamot nga makuha ang bahin sa management alang sa maong butang.
Hinuon, nagpadala sila sa SunStar Davao og kopya sa ilang press statement, diin ilang gibutyag nga ang bottling industry nanginahanglan og 450,000 metriko tonelada (MT) nga premium nga refined nga asukal, subay sa plano sa gobyerno nga mag-import og 150,000 metriko tonelada sa asukal aron madugangan ang kakulangan sa lokal nga suplay.
Sa usa ka pamahayag niadtong Sabado, Agosto 20, ang Coca-Cola nagpasalamat kang Presidente Ferdinand Marcos Jr., kinsa mao usab ang pangulo sa Department of Agriculture ug Chair sa Sugar Regulatory Administration, sa iyang hinanaling aksyon sa pagsulbad sa kakuwang karon sa premium refined nga asukal sa nasud.
Apan giingon sa kompanya nga, "that not all sugar is the same."
"Food and beverage manufacturers need premium refined sugar to maintain high-quality products. This type of sugar is not the same sugar that is commonly used in households," dugang sa Coca-Cola.
Ang kompanya sa ilimnon miingon nga adunay gibana-bana nga 400,000 metriko tonelada nga gintang sa ibabaw sa pagsugod nga gintang nga 200,000 metriko tonelada sa lokal nga suplay sa asukal alang sa 2022.
Gibase kini sa giplanohang panginahanglan nga 2.3 milyon metriko tonelada alang sa 2022 alang sa tibuok nasud, sumala sa kompanya.