NITAAS ang presyo sa menudong bugas sa pipila ka pampublikong merkado sa siyudad sa Davao bisan kon bastante ang suplay sa pagkakaron, sumala sa pipila ka mga manindahay kinsa nagpahaum sa sitwasiyon.
Base sa price monitoring nga gihimo sa SunStar Davao niadtong Martes, Mayo 9, sa Agdao Public Market, ang pinakabarato nga bugas mao ang SP nga lokal nga bugas (regular milled rice) nga gibaligya og P38 matag kilogramo(/kg), gisundan sa M3 Ricel Local nga naa sa P40/kg, 7 Tonner Banaybanay (well milled rice) sa P42/kg, V-160 Banaybanay (P43/kg), Premium Rice (V-160 Imported) sa P45/kg, ug Premium Rice (Jasmine Rice imported) naa sa P47/kg.
Samtang sa Bankerohan Public Market, ang Premium Rice gibaligya og P40/kg, Jasmine Rice (P43/kg), Special Rice (P44/kg), ug Humot Rice (P45/kg).
Gisulti ni Marcelo Cordova, nagtinda sa Agdao Public Market, nga ang presyo sa bugas sa merkado nitaas og 20 porsiyento, uban ang average price sa kilo sa bugas nga moabot og P45 gikan sa kanhi P30.
Matud ni Cordova nga ang pataas sa presyo tungod sa daghang hinungdan, sama sa inflation ug panghitabo sa El Niño weather phenomenon.
Tungod kay way ani sa mga lokal nga mag-uuma atol sa ting-init, gikanayon niini nga kasagaran sa tigpamaligya nag-agad sa rice import inay sa lokal.
Dugang pa niya nga ang El Niño phenomenon nihatag og dakong impak sa produksiyon sa bugas, ilabi na sa mga suplayer.
“Big impact gyud na siya sa local rice [production] natin - pero pag-dry [season], no more stocks talaga yan,” tataw ni Cordova.
Samtang si Ronnie Buendia, nagtinda sa Bankerohan Public Market, nagsulti nga sa pagkakaron, ang suplay sa bugas nagpabilin nga lig-on. Kini bisan kon miingon siya nga gilauman nga presyo niini motaas.
“Okay ra man ang stocks tungod man gud sa init nga panahon pud ba. Mahirap talaga magbenta tungod sa kamahal... Dugay ra pud mahurot,” dugang niya.
Aron malikayan kini, pipila sa mga naninda sa Davao City nagpahiuyon sa sitwasiyon aron maseguro nga mga konsumante makapalit gihapon og maabot nga presyo.
Samtang duna say mga naninda nga nidangop og laing mga suplayer aron makubsan ang impak sa pagtaas sa presyo, sulti ni Cordova.
Puno pa niya, “Sa next month, maghulat pa mi sa announcement about sa shortage”.
Hinuon dunay pipila ka nanidan nga nahinabi sa SunStar nagkanayon nga wala silay namatikdan nga katikaran sa ilang patigayon bisan sa pagtaas sa presyo sa bugas, kay kasagaran sa mga konsumante naanad nang magsagop sa pag-ubos ug pagtaas sa presyo ug padayon nga nagapalit og bugas. (ICM/Justine Lu, ADDU intern)