ARON sa pagseguro nga luwas ang mga sementeryo sa Davao City ug bisan sa kinatibuk-ang Davao Region, gilibot ni Police Regional Office (PRO)-Davao director Brigadier General Filmore Escobal ang mga sam-ang Biyernes, Nobyembre 1.
Giseguro sa kapulisan nga mapatunhay gayod ang kahapsay ug kalinaw sa mga sementeryo subay sa mga pasidaan sa awtoridad sa mga dili angay dalhon sa sulod sa mga sam-ang.
Una niini, gipasayod na sa kapulisan ang dili angay dalhon sama sa mga mahait nga hinagiban, mga baraha, ilimnong makahubog, sigarilyo, lighter, mga karaoke, ug mga backpack.
Gidili sab ang mga lango sa ilimnong makahubog sud sa mga sam-ang gumikan gitan-aw nga usa sab kini sa mga magpasiugda sa kasamok labi na kung mabikil.
Usa sa mga gilibot sa director sa kapulisan mao ang dagkong sementeryo sa siyudad sa Davao nga mao ang Wireless Cemetery, Buhangin Cemetery, ug ang Davao Memorial Park.
Usa ka adlaw una ang kalag-kalag ang Davao City Public Safety and Security Command Center (DCPSSCC) uban ang K9 Unit sa awtoridad nilibot na sa mga terminal ug sementeryo aron sa pagseguro nga luwas ang publiko. (Jeepy P. Compio)