Program sa gobyerno makita sa ‘Budyong sa Bus’

MALAMPUSONG napahigayon ang programa nga "Budyong sa Bus" nga gipangunahan sa nasudnong gobyerno ug pipila ka mga local government units (LGUs) sa rehiyon pinaagi sa public utility bus sa Davao Metro Shuttle Company, Abril 12, 2024.

Sa impormasyon gikan sa Philippine Information Agency (PIA) Davao Region, ang programa usa ka estratehiya sa pagsabwag sa impormasyon dala ang mga programa ug serbisyo sa mga ahensya sa nasudnong gobyerno ug LGU.

Kauban ang Regional Director sa PIA Jemin Guillermo ug ang Executive Officer sa Davao Metro Shuttle Corporation nga si Emerald L. Uy misuporta sa nagmalampuson nga programa.

Dunga niini, gihimo usab ang pagpinirmahay sa memorandum of agreement (MOA) tali sa PIA-Davao ug sa Metro Shuttle, sa nakalabay nga Biyernes, Abril 5, 2024.

Ang unang biyahe sa Budyong sa Bus nga gadagan sa Tagum City paingon Davao City nga rota uban ang lain pang siyam ka mga yunit sa bus kung diin aduna kini TV/radio infomercial ug video clips nga gikan sa lain-lain nga ahensya sa gobyerno sa Davao Region.

Gipakita sa video ang mga kasayuran ngadto sa mga pasahero sa bus kung unsa ang anaa sa Davao Region ug uban pang programa sa gobyerno.

Ang estratehiya sa komunikasyon usa ka inisyatiba sa PIA Davao Region sa pakigtambayayong sa Davao Metro Shuttle Company nga unang higayon nga nahimo sa ahensya. (JPC/ETI, PIA-Davao Region)