Publiko gipaalerto sa CDRRMO

Hulagway iya ni Racez Villegas
Hulagway iya ni Racez Villegas

GIAWHAG sa Davao City Disaster Risk Reduction and Management Office (CDRRMO) ang publiko nga mag-alerto human sa serye sa mga linog niadtong Miyerkules, Septyembre 6, 2023.

Ang Intensity 3 nga linog nga miigo sa dakbayan niadtong Miyerkules sa hapon gisundan og laing Intensity 4 nga pagtay-og. Ang origin sa linog nasubay nga nagagikan sa Cotabato Fault System.

Gisulti ni CDRRMO Operations Assistant Ezra Fernandez nga pipila ka ihap sa mga edepisyo sa walo ka mga barangay sa dakbayan nakabaton og ginagmay nga mga danyos. Mga pampublikong tulunghaan niining maong mga barangay nakabaton sab og ginagmay nga mga danyos.

Kinatibuk-ang 125 ka tinun-an gikan sa mga tulunghaan sa Matina Crossing, Catigan, Toril Proper, Mintal, Baguio Proper, Calinan Proper, ug San Antonio kinahanglan nga luwason. Traynta y siete niini gidala ngadto sa ospital samtang 88 giatiman diha mismo sa tugkaran sa mga tulunghaan sa tagsa-tagsa nila ka mga personahe sa Barangay Disaster Risk Reduction Management Committee (BRRDMC).

Kasagaran sa mga tinun-an, matud ni Fernandez, nakasinati og paglisud og ginhawa kon diin uban kanila nawad-an og panimuot human nataranta.

"Some of them due to nag-panic sila sa pag-evacuate. Some of them naka-experience og difficulty in breathing and eventually nahimatay pud gyud sila," tug-an ni Fernandez atol sa I-Speak media forum niadtong Huwebes.

Tungod niini, ang CDRRMO nagpahayag sa kaimportante sa disaster preparedness sa tanang mga establisemento. Nagpahimangno si Fernandez sa publiko nga ang regular nga praktis sa earthquake drills ug evacuation exercises hatagan og bili sa mga tulunghaan.

Ang information and education campaign sa CDRRMO sa mga tulunghaan, dugang ni Fernandez, nagpadayon aron nga andamon ang mga tinun-an sa panahon sa kalamidad.

"One of our interventions is to conduct information drive sa atoang mga eskuwelahan. Dili lang sa mga eskuwelehan but also sa mga private companies," pagtin-aw niya.

Mga tulunghaan mahimong mohangyo sa CDRRMO nga molusad og disaster preparedness activities alang sa ilang mga tinun-an.

Niadtong Septyembre 7, usa ka dinungan nga nationwide earthquake drill ang gilusad sa tanang mga pampublikong establisemento. (CIO)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph