NAPUNERARYA ang usa ka gituohang drug pusher human nga misukol sa kapulisan sa Eden Police Station atol sa gikasa nga buy-bust operation Miyerkules sa gabii sa Purok 11 Angeles, Barangay Catigan, Toril District, Davao City.
Ang operasyon miresulta sa pagniyutralisa sa dakpunon nga si alyas Hassan, taga Bangkal, siyudad sa Davao.
Una niini, ang operatiba sa Police Station 19 - Eden Drug Enforcement Unit mihimo og drug buy-bust operation batok sa target nga si alyas Hassan.
Dihang positibo nga mobaligya ang suspek, nagdinawatay na kini sa salapi bugti sa gituohang shabu, apan nakamatikod ang suspek nga mga pulis ang iyang ka-transaksiyon maong mibunlot kini'g pusil ug gitirahan ang operatiba.
Gidala pa ang suspek sa Davao Mediquest Hospital Incorporated, apan pagka- kaadlawon, Agosto 10, namatay kini.
Nakuha sa posisyon sa suspek ang iyang armas, bala, ug gituohang shabu nga motimbang og 1.011 gramos nga gibana-banaang mobalor og P6,900.