PUV IDs gilugwayan og 1 tuig

(File Photo)
(File Photo)

GITANGTANG sa Davao City Transport and Traffic Management Office (CTTMO) ang "December 31st default expiration date" sa tanang Public Utility Vehicle (PUV) driver’s ID nga giisyu sa siyudad, aron mas dali ug mas sayon ang proseso sa renewal.

Kini nagpasabot nga ang identipikasyon sa PUV driver nga giisyu sa usa nga dunay gitagana nga petsa dili na ma-expire sa katapusan sa tuig, apan balido na hinuon hangtud sa samang petsa sa sunod tuig.

Ang pag-usab sa sistema sa pagparehistro sa ID sa PUV drivers tumong nga mapugngan ang daghang mga drayber sa PUV nga maka-renew sa maong adlaw sa pagsangko sa expiration sa Disyembre 31 sa opisina sa pagparehistro sa CTTMO.

Kini nga bag-ong sistema epektibo usab nga makapakunhod sa proseso sa paglinya ug sa katapusan makapamenos sa oras sa paghulat sa mga drayber sa PUV, kini suma ni CTTMO head Dionisio Abude sa pakighinabi sa City Information Office niadtong Miyerkules.

"Halos mag-abot silang tanan kay the same ilang expiration. So gi-usab nato para kung nakapa-renew sila, kunyari, atong February so February next year na mag-expire. Dili na mag-clog up diri sa atong opisina,” ingon ni Abude.

Libre pa ang pag-isyu sa ID, matud ni Abude, nga nagkutlo sa City Ordinance No. 0334-12 nga nagmando sa tanang PUV drivers sa pagkuha og PUV Driver's ID ug ibutang kini sa full display.

Ang mga drayber nga gustong mokuha og PUV Driver's ID kinahanglang magpakita sa ilang driver's license, Official Receipt/Certificate of Registration (OR/CR) para sa mga operator-driver, ug certificate gikan sa PUV operator nga nagpamatuod sa naghupot isip driver sa PUV unit diin ang parehas nga mga dokumento gikinahanglan sa pag-renew.

Niadtong 2022, ang CTTMO niisyu og 17,804 ka PUV Driver’s ID. Diin 5,736 ang para sa mga traysikol drayber, anaa sab sa 5,707 ang kinatibuk-an sa mga taxi drivers, samtang 5,451 ang para sa mga jeepney driver. Ang uban alang sa mga drayber sa mga pasaheroan nga van ug mga yunit sa bus.

Gikan sa Enero 1-11 ning tuiga, niabot na sa 463 ka PUV driver’s ID ang na-issue sa maong buhatan.

Matud ni Abude nga ang mga PUV drivers nga nag-operate sa ilang mga unit nga walay PUV Driver's ID o kansang PUV Driver’s ID expired na ang pamultahon og P1,000.

Nipasidaan siya nga usa ka criminal offense ang pag-operate gamit ang peke nga PUV Driver's ID. (JPC/CIO)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph