NANGUNA si Cotabato Governor Emmylou "Lala" Taliño Mendoza, uban sa pipila ka opisyal sa kagamhanang probinsiyal, sa pagbendisyon ug inagurasyon sa P14.7 milyon nga Provincial Veterinary Quarantine Services Center sa Barangay Old Bulatukan, Makilala, Cotabato Province.
Ang quarantine facility gipundohan ubos sa administrasyon ni Mendoza niadtong 2018.
Ang maong pasilidad giingong dakong tabang aron mapugngan ang pagkuyanap sa mga makatakod nga sakit sa mga mananap sama sa African Swine Fever (ASF) nga nakaapekto sa sektor sa agrikultura sa probinsiya.
Ang tanang indibiduwal ug sakyanan nga mosulod sa mga utlanan sa probinsiya kinahanglang moagi sa footbath nga giandam sa Office of the Provincial Veterinarian (OPVet) aron malikayan ang pagsulod sa makatakod nga mga sakit sa mananap.
Sumala ni Bureau of Animal Industry (BAI)-Soccsksargen Regional Veterinary Quarantine Officer Dr. Castor Leo A. Ejercito nga ang katukuran sa pasilidad maoy labing una, nag-inusara ug pinakadako nga veterinary quarantine sa tibuok Soccsksargen.
Samtang gipasalamatan ni Mendoza si kanhi Boardmember Loreto Cabaya sa iyang paningkamot nga matuman ang proyekto samtang nagserbisyo pa siya sa probinsiya.
Gipasalamatan usab siya sa BAI XII tungod sa disinfection truck nga gihatag ug dako og ikatabang sa operasyon sa pasilidad.