DAGHAN ang miuyon sa dihang gianunsyo sa Department of Health (DOH) nga molugway sa Hunyo 30, 2020 ang general community quarantine (GCQ) sa Davao City.
Sumala sa tindera og bulak sa Bankerohan Public Market nga uyon siya nga bisan pa og mohangtud sunod tuig ang community quarantine sa Davao aron luwas gayod ang katawhan sa coronavirus disease 2019 (Covid-19).
"Uyon kaayo ko bisan pa og hangtud sunod tuig para ma-sure gyud nato nga safe nata sa virus," sulti ni Maricar Suarez, 35 anyos.
Sulti sab sa usa ka traysikel drayber sa Father Selga Street, Barangay 8-A nga mas maayong maabot pa sa sunod tuig ang quarantine apan modified GCQ na kini samtang gahulat sa vaccine.
"Puwede pa og hangtud next year samtang wala pa ang bakuna, kay para luwas ang mga bata, o kitang tanan," ni Greg Gildore, 41 anyos, taga Exodus sa maong barangay.
Butyag sab sa usa ka fruit vendor sa Bankerohan nga naanad na ang katawhan sa mga health protocols ug puwede na nga bisan sa sunod tuig pa molugway ang quarantine.
"Naanad na bitaw ta aning sitwasyona, haylabi'g magka-Covid ta kay kung buhian ta nga sama niadto, sus unsa kahay dangatan," ingon ni Helen Acordo, 44 anyos.
Una niini, gibutyag ni Davao City Mayor Sara Duterte-Carpio nga maghulat gayod ang dakbayan kung unsay mandu sa Inter-Agency Task Force on Covid-19 (IATF).
"Duna nana siya'y formula and we rely on them sa pag-classify sa unsang quarantine ta," naunang pamahayag sa mayor una mianunsyo ang DOH Martes sa gabii nga ang Davao City ug Zamboanga City maoy magpabilin sa GCQ, samtang ang tanang mga dapit sa Mindanao anaa na sa MGCQ.
Gipasalig sab ni Duterte-Carpio nga dunay 42,000 ka mga bakanteng trabaho alang sa mga Dabawenyo ug dunay scholarship program ang kagamhanan alang sa mga tinun-an sa siyudad.