MAGSAYSAY, Davao del Sur -- Nag-alayon ang mga ahensiya sa nasyonal nga gobyerno aron inspeksiyunon ug sutaong luwas ang mga relocation site nga pagabalhinan sa mga pamilyang mibakwit sa linog.
Lima sa pito ka mga girekomenda sa lokal nga gobyerno ang na-assesed na sa Regional Disaster Risk Reduction and Management Council-11 nga luwas puy-an sa mga biktima sa tulo ka sagunsong linog.
Nahuman na og inspeksiyon ang National Housing Authority XI, Mines and Geosciences Bureau XI, Department of Social Welfare and Development XI, ug Office of Civil Defense XI mao sugdan na ang rehabilitasyon.
Ang tulo ka relocation sites sa mga barangay sa San Miguel, Malawanit ug usa sa Clam Village, Poblacion Proper ang papuy-an sa mga bakwit gikan sa Barangay sa Tagaytay, Sitio Macabolos, Purok 6, 7 ug 8, Purok 5 ug 6 sa Sitio B’lasan, Barangay Upper B’lasan ug Purok 12 sa Barangay Bahacanan.
Gibutyag ni Herbert Villano, geologist sa Mines and Geosciences Bureau XI nga ang mga aprobadong relocation sites kinahanglan nga dokumentado.
Nasayran nga aduna’y mga lugar nga di mahimong relocation site sa Purok 10 sa mga barangay sa Balnate ug Bacungan.
“We suggest to the local government unit to look for other possible relocation sites since the ones we evaluated did not have good terrain, with a very steep slope in the center of the property,” asoy ni Villano.
Gitataw sab ni Engr. Romy Cesamilo sa National Housing Authority XI nga giaprobahan nila ang upat ka mga relocation sites ug ang usa nagkinahanglan pa og mitigating structure alang sa slope protection.
Matud niini nga dili niya i-rekomenda ang mga site sa Balnate ug Bacungan tungod kay aduna kini mga steep slopes.
Hinuon, maagian ang mga dalan padung sa lugar apan adunay mga bahin nga lisod ang pag-agi sa mga sakyanang magdala sa mga construction materials tungod kay dili konkreto ang dalan. (Orlando B. Dinoy)