NAG-TRENDING sa social media human gipuli-pulian og gunit ang dako nga bitin aron magpa-picture didto sa Purok 5-A, Barangay Peñaplata, Island Garden City of Samal, probinsiya sa Davao del Norte.
Sa miaging semana, miani og komento sa mga netizens ang pagpuli-puli og gunit sa sawa sa mga residente daplin sa baybayon sa Purok 5-A sa maong barangay.
Kadaghanan sa mga netizens nag-ingon nga kinahanglan ibalik kini dayon sa iyang natural nga pinuy-anan human nga i-turnover sa City Environment and Natural Resources Office (Cenro) sa maong isla.
Makita sa video ni Henry Descalsota nga daw, dulaan ang bitin diin gipuli-pulihan kini og gunit sa mga residente aron magpa-picture.
"Dapat pagkakita nila, pag-report nila sa barangay, diretso unta ni sa DENR dayon ibalik sa iyang natural nga habitat, o di kaha ang DENR ang naay facility ani nga para mora ra pud og natural, luoy kaayo ang bitin naluya na'g gunit-gunit," ingon sa usa ka Marelle Lastimosa, tinun-an sa UP Mindanao nga nagpaabot og komento sa Superbalita Davao labot sa hitabo.
Una niini, nakit-an sa mga residente ang maong usa ka reticulated python dunay gitas-on nga siyam ka tiil ug dunay gibug-aton nga walo ka kilo nga anaa sa dagat daplin sa baybayon sa Purok 5-A.
Gilayong gibira sa mga residente, diin ang maong bitin gituohang gikan sa kakahoyan sa Hagimit Falls, diin miagi sa Binuling Lake ug napadpad sa dagat.
Ang Hagimit Falls dunay giingong mga sightings sa mga reticulated python kun sawa, di kini mamahit og di maipit, apan sa ngan nga bitin gikahadlokan gayud.
Sa pagsuwat ning maong balita, ang nasampit nga bitin anaa na sa pagkustodiya sa Cenro-Samal Island.