GOOD news sa taga Davao City gumikan laing hugna na sab sa scholarship program ang gihanyag karon sa 1st Congressional District Office nga gipangunahan ni Representative Paolo Z. Duterte.
Sa pahibalo gikan sa buhatan nga nagdawat na sila karon og mga aplikante alang sa scholarship sa Technical Education and Skills Development Authority (Tesda) program.
Ang Tesda Training for Work Scholarship Program (TWSP) nagtumong sa pagpadayon sa pagpuno sa mga kakulangan sa kahanas ug mga kinahanglanon sa trabaho sa mga prayoridad nga mga industriya ug sektor nga adunay taas nga panginahanglan sa panarbaho, pagpalambo sa pagkab-ot sa kalidad sa Technical Vocational Education and Training (TVET).
Dugang pa nga ang Tesda nag-awhag sa mga teknikal-bokasyonal nga institusyon sa pagtanyag sa programa nga adunay mas taas nga kwalipikasyon nga nag-atiman sa mga kinahanglanon sa industriya. Kini mosuporta sa pagduso sa gobyerno sa paspas, inklusibo, ug malahutayong pagtubo sa ekonomiya.
Ang buhatan ni Rep. Duterte nangita'g mga benepisyaryo sa programa nga adunay mosunod nga mga kwalipikasyon: una nga kinahanglan 18-anyos ang panuigon sa panahon nga ang scholarship makatapos sa programa sa pagbansay sa Tesda, ug kinahanglan nga usa ka high school graduate.
Ang mga programa sa scholarship nga gitanyag sa 1st Congressional District Office mao ang Automotive Servicing NC I, Shielded Metal Arc Welding (SMAW) NC I, Electrical Installation and Maintenance NC II, Health Care Services NC II, Computer Systems Servicing NC II, ug Shielded Metal Arc Welding (SMAW) NC II.
Mga nahisgutang kurso puwede kuhaon sa mga mosunod nga institusyon, sa Davao Institute of Technical Education, Inc., Toyozu Technical School Foundaton, Inc., Efficio Training, Inc., St. Patrick Math-Sci School, Inc., Core Institute of Technology Incorporated.
Sa mga interesado nga mga aplikante, bisitaha ang 1st Congressional District Office nga anaa nahimutang sa kanto sa mga dalang Ponciano ug Palma Gil, Davao City, pangitaa si Mr. Loreto G. Masaglang.
Mga aplikante mamahimo sab nga motawag sa mga numero nga 09667510792 sa Globe ug sa 09683022613 sa Smart.
Si Rep. Duterte niingon nga ang Tesda importante kaayo sa pagtabang sa mga Pilipino sa pag-upgrade ug pag-reskill. Dugang pa niya nga aron makapadayon ug makamugna og mga gradwado nga adunay mga gikinahanglan nga kahanas, ang Tesda kinahanglan kanunay nga mopalambo sa mga programa ug serbisyo niini.
