DUNA nay gihikyad nga plano sa seguridad ang Public Safety and Security Command Center (PSSCC) sa Davao City alang sa taliabot nga kalag-kalag sa Nobyembre 1 ug 2, sumala ni head Angel Sumagaysay niadtong Miyerkules, Septyembre 28.
"Na-formulate na siya and I will present this before the members of PSSCC and also Department Heads Meeting," butyag ni Sumagaysay atol sa paghinabi kaniya sa radyo.
Dugang pa niini nga makig-alayon sila uban sa lain pang mga ahensiya sa lokal nga panggamhanan ug mga tagdumala sa mga sementeryo sa dakbayan.
Ila sab nga gikonsidera ang tambag gikan sa City Health Office (CHO) bahin sa kahimtang sa Covid-19.
"Isa na sa mga consideration nato kay naa pa man ang Covid," matud ni Sumagaysay.
Imonitor sab sa siyudad ang dagan sa trapiko aron nga malikayan ang grabeng paghuot unya.
Samtang gisulti ni Covid-19 Task Force Spokesperson Dr. Michelle Schlosser nga ang inisyal nilang mga plano mao ang pagmuntar og mga tulda sa mga sementeryo aron nga mamonitor ang kahimtang sa panglawas sa mga bisita tungod kay mga indibiduwal nga magpakita og mga simtomas di tugtan nga makasulod.
Gitin-aw ni Schlosser nga ang minimum public health standards padayon nga ipatuman ning panahona tungod kay ang kasaulogan sa kalag-kalag mahimong posibleng kalihukan nga dunay daghang nga matakdan sa sakit.