GIANDAM na og hikyad karon sa security cluster sa Davao City, pangunahan sa Davao City Police Office (DCPO) ang ipatuman nga seguridad sa adlaw sa piyesta sa Sto. Niño sa Shrine of the Holy Infant Jesus of Prague sa Matina sa Dominggo, Enero 15, 2023.
Ang pag-obserba sa piyesta sa Dominggo timaan sa pagbalik niini human ang duha ka tuig nga pagkasuspende tungod sa pandemya.
Isip pagpangandam sa pagdasok sa mga tawo, hugot nga seguridad ang ipahimutang sa mga simbahan nga nag-obserba sa maong adlaw, ilabi na sa Shrine of the Holy Infant Jesus of Prague.
Base sa protocol, ipakatag ang personahe sa mga pulis kon diin uban niini magpatrolya sa palibot, matud pa ni DCPO Spokesperson Police Major Catherine Dela Rey atol sa Madayaw Davao program gisibya sa Davao City Disaster Radio sa Martes.
Dugang niya nga tungod kay ang lugar gikuralan, ang paghatag og seguridad mas sayon nga himuon. Ang kaandam sa pakig-alayon sa mga nag-alagad nga mga tawo sa lugar dako sab og ikatabang aron nga maseguro ang malinawon nga selebrasyon.
Tungod kay ang mga misa sa Dominggo gilauman nga makahatak og di kasarangan nga bagang duot sa katawhan, nagpahimangno si dela Rey nga ang naandan nga patakaran ipatuman sa maong adlaw. Kini magpasabot nga mga mahait nga butang, backpacks, mga di sihag nga sudlanan og tubig ug uban pang gidili nga mga butang di tugtan sa lugar.
Nagpasidaan sab siya sa mga tawo nga magpabiling alerto ug ibutang sa hunahuna nga culture of security sa siyudad. (CIO)