MOABLI ang Philippine Statistics Authority (PSA) og Civil Registry Services outlet (Serbilis Center) sa siyudad sa Kidapawan sa unang kuwarter sa 2023.
Kini ang gisulti ni PSA XII Regional Director Maqtahar L. Manulon atol sa exploratory meeting nga gipangulohan sa National Economic and Development Authority (NEDA) Davao Region.
Matud ni Manulon, si PSA National Statistician ug Civil Registrar-General Undersecretary Claire Dennis S. Mapa maoy mimando nga ipabutang dayon ang CRS outlet sa Kidapawan City tungod sa hangyo sa lokal nga panggamhanan niini.
Sa pagkakaron, nagsugod na ang proseso sa pagbutang og CRS outlet sa dakbayan.
Gilauman nga sa katapusan sa Pebrero 2023, magsugod na ang serbisyo sa PSA-CRS outlet sa siyudad diin makuha ang PSA-authenticated civil registry documents (sama sa birth certificates, death certificates, marriage contracts, ug certificates of no marriage) sulod lang sa duha ka oras.
Ang PSA-CRS Kidapawan City usa lamang sa mga resulta sa paningkamot sa RDC XII nga mapaduol, ma-organisa ug mapadali ang paghatud sa mga serbisyo sa gobyerno ngadto sa katawhan.
Sa 2020, namugna ang RDC Davao sa Pag-Ibig Fund Branch sa Isulan, Sultan Kudarat, PhilHealth Express Office sa Midsayap, Cotabato ug Lebak, Sultan Kudarat, ug GSIS Servicing Unit sa Koronadal City niadtong 2021, ug karong Septyembre 2022, mao ang DFA Consular Office sa Kidapawan City.