ANG pagkonstrak sa Samal Island–Davao City Connector (SIDC) project, labing nailhan sab isip Samal-Davao Bridge, gisugdan na sa habig sa Island Garden of City of Samal (Igacos).
Gisulti ni Davao del Norte governor Edwin Jubahib nga ang habig sa Igacos, ipabarog ang mga posteng pangpundasyon alang sa tulay ug pagsuta sa yuta nagpadayon, kon diin mga ekipo gikan sa China maoy gigamit. Ang China Road and Bridge Corporation mao ang kontraktor sa maong proyekto.
“Nagpadayon man, ongoing ang pagtrabaho niini… nakita nato naa’y resistance pero nakita nato nga padayon ang construction sa maong bridge,” pagklaro ni Ubahib sa pinakalit nga paghinabi kaniya atol sa 74th founding anniversary sa People's Republic of China, Huwebes sa gabii, Septyembre 21 sa DusitD2 Hotel.
Nasayran nga ang pagkonstrak sa tulay nasang-at na ngadto sa Korte Suprema ug sa Court of Appeals, human nga dunay kaso nga gipasaka sa pamilyang Lucas-Rodriguez, mga tag-iya sa nailang Paradise Island Park and Beach Resort ug Costa Marina Beach Resort sa Igacos aron ikontra ang SIDC project. Apan ang mga kaso gibasura sa Court of Appeals.
Ang grupo nga gipangunahan ni Rodriguez et al. nipasaka sab og Petition for Continuing Mandamus with the Supreme Court. Ang ilang petisyon nagtinguha nga mapagawsan og Temporary Environmental Protection Order (TEPO), Temporary Restraining Order (TRO), ug Writ of Preliminary Injunction aron ihunong ang konstraksiyon sa SIDC bridge.
Sa pagkakaron, naghuwat pa sila og hukom gikan sa Korte Suprema sa ilang hangyo.
Tungod niini, si Jubahib nagpadayag sa iyang paglaum nga mga kaso maareglo kay makabenepisyo ang Igacos sa maong kalamboan. (ICE)