GIPASABOT sa Southern Philippines Medical Center (SPMC) - Department of Emergency Medicine ang pagsaka sa ihap sa mga pasyente nga adunay sakit sa tiyan, kalibanga, ug pagsuka sa panahon panahon sa kapaskuhan.
Si Kenny Gene R. Salvador, Emergency Medicine Specialist sa SPMC nagkanayon atol sa Kapehan sa PIA, kagahapon sa buntag, Biyernes, Disyembre 15, 2023, sa NCCC Mall VP, nga ang mga Dabawenyo hilig sa pag-init og balik sa mga salin nga pagkaon.
Gidasig sab sa opisyal nga kung mamahimo likayan ang pagsige og init sa pagkaon, diin mas maayong moluto lamang og tama-tama aron nga kini mahurot gayod nga presyo pa.
“Kay ang tendency man gyud nato diba kay diba mag-prepare, naay mabilin i-ref, initon kaonon usab. Naa pay mabilin i-ref na pod – naa gyud off chance diha nga madam ang pagkaon,” ingoni ni Salvador.
Gipadayag ni Salvador nga sagad niini nga mga pagkaon nga ginaluto mao ang fried-rice o nailhan sab nga kalu-kalu nga maoy sagad ginahimo sa kadaghanang mga Pinoy.
Sama sab sa spaghetti, macaroni salad, ug pagkaon nga adunay dairy ug itlog; sa higayon nga kini mabiyaan, kini adunay taas nga kalagmitan sa pagkadaut.
Gihatagan usab niya og gibug-aton ang kamahinungdanon sa husto nga pagdumala ug pag-andam sa mga pagkaon nga gisilbi sa mga panagtapok sa holiday.
“Isipin nato permi nga mas mahal magpa-hospital kaysa mopalit ka og bag-o nga pagkaon so kana nalang atoang isipon mas hassle man gyud ma admit,” butyag ni Salvador.
Dugang pa niya nga kinahanglang magmabinantayon ang mga konsumidor sa mga produkto sa pagkaon nga ilang paliton alang sa ilang Noche Buena.