SWS: 61% ka pamilyang Pinoy naglain sa basura

BAG-ONG surbey sa Social Weather Stations (SWS) nagpakita nga 61 porsiyento sa mga pamilyang Pinoy “kanunay” naglain sa ilang mga basura.

Ang surbey, gihimo gikan Marso 26 hangtud 29, 2023, nagbutyag nga sa 61 porsiyento nga mga pamilya, 44 porsiyento niini giingon nga kanunay nga naglain ug 17 porsiyento "often" naglain sa biodegradable nga basura gikan sa non-biodegradable.

Giingon sab nga 20 porsiyento ka pamilya “usahay” naglain sa ilang mga basura samtang 20 porsiyento niini wala gyud maglain sa mga basura.

Nasayran sab sa surbey nga ang pagkolekta sa mga basura mao ang pinaka-komon nga waste disposal method sa mga kabalayan uban ang 64 porsiyento nga respondente nagsulti nga garbage trucks nagkolekta sa ilang mga basura.

Baynte siyete (27) porsiyento nagsulti nga ilang gisunog ang ilang mga basura, 9 porsiyento naglubong niini sa yuta, 8 porsiyento naglabay niini sa mga bangag, ug 4 porsiyento nigamit og laing pamaagi sama sa "composting, feeding it to animals," o maglabay niini sa mga sapa.

Gihinabi sa SWS ang 1,200 ka mga pangulo sa pamilyang Pinoy sa tibuok nasud. Duna kini margin of error nga ± 2.8 porsiyento. (PNA)