NAG-INUSARANG mananaya nga taga Davao del Sur nahimo na karong pinakauwahing milyonaryo human gidaug ang PHP29.7-milyon nga jackpot sa Grand Lotto 6/55 niadtong Sabado, Marso 11, 2023.
Saktong nakatagna ang nag-inusarang mananaya sa kombinasyon nga midaug nga 45-29-12-03-26-51, sumala sa Philippine Charity Sweepstakes Office (PCSO) Dominggo.
Ang tiket napalit niini sa Davao City sa probinsiya sa Davao del Sur.
Samtang laing pito pa ka mga mananaya midaug og P100,000 matag usa sa dihang naigo ang lima sa unom ka winning digits ug 662 nakabulsa sab og P1,500 matag usa sa upat ka mga saktong digits.
Ang Grand Lotto 6/55 bolahon matag Lunes, Miyerkules ug Sabado.
Kini na ang ikalimang higayon karong bulana nga nag-inusara nga mananaya midaug og jackpot sa duwa sa loteriya sa kagamhanan.