SEGURADONG magustohan sa kadaghanan labi pa kung mapatukar na kini sa mga istasyonan sa radyo ang mga obra nga kanta sa local band nga sagad kanila nagagikan sa Island Garden City of Samal (Igacos) sa Davao del Norte nga "radical de-Fender."
Atol sa ilang album launching niadtong Pebrero 10, 2023 didto sa Seattle's Dream Cafe sa Arellano Street, Davao City, milanog ang mga awit nga mugna sa maong local band nga nagustohan gayod sa kadaghanan.
Sumala sa female vocalist nga si Jasmine Campos Cabilla nga sulod sa iyang mga kasinatian sa kinabuhi ug sa mga kaubanan sa maong banda, ilang namugna ang mga kanta nga ang tanan malambigit.
Uban ni Cabilla ang male vocalist nga si Ranil Atillo, ang bassist nga si Al Delmores, naa sab si Jessie Sultan Jr., nga mao ang lead guitarist, naa sab si Karlo Ortiz kinsa mao ang keyboardist ug si Ken Bryan Montaño ang drummer.
Mga bisita sa album launching nakabilib gayod sa radical de-Fender gumikan sa ilang mamugnaong hunahuna ngadto sa pagtagik sa kanta.
Usa sa ilang gikuhaan matud pa sa inspirasyon sa pagmugna sa mga awit, mao ang ilang kasinatian nga nasinati sab sa tanan panahon sa pandemya.
Usa sa ilang mga awit mao ang gititulohan og Selpon, Alipin, Bulkan, Marites, Hagod, Ramdam, Pahina, Sukli, Walang Hihigit, Tatag, ug ang Muli't Muli.
Ang maong mga awit madunggan na sa proprietary Swedish audio streaming and media services provider nga Spotify.
Ning kasamtangan, taas ang ilang pangandoy nga unta madungog sila sa mga tawo nga maoy makapadala nila ngadto sa entablado sa pagpaambit sa mga awit, nga gama sa mga local artists nga sama kanila.