USA ka Tagumenyo nga kasamtangang anaa sa probinsya sa Leyte ang nakasakmit og nasudnong posisyon dihang gibotohan kini isip Board of Director sa Philippine Electricity Market Corporation (PEMC) nga morepresenta sa distribution sector for the electric cooperatives sa tibuok nasud.
Si Allan Lamparaz Laniba, taga Davao ug midaku na sa sa siyudad sa Tagum ug kasamtangang general manager sa Leyte III Electric Cooperative, Inc. (Leyeco III) ug project supervisor ug AGM sa Don Orestes Romualdez Electric Cooperative, Inc. (Dorelco), midaug sa pinakaunang eleksyon sa PEMC niadtong Hunyo 25, 2018 didto sa Pasig City.
Ang Philippine Electricity Market Corporation (PEMC) namugna pinaagi sa Epira pinaagi sa Department of Energy aron maoy moatiman sa electricity spot market sa nasud.
Isip mandato sa Republic Act No. 9136, duna gayuy eleksyon sa PEMC, usa ka tuig human sa pagkamugna niini. Apan, usa ka dekada pa ang milabay ug pila pa ka kalihim sa DOE ang milingkod una naatiman ang maong mandato ubos ni DOE Secretary Alfonso G. Cusi sa administrasyon ni President Rodrigo R. Duterte.
Sa milabay nga tuig, gi-appoint ni Sec. Cusi ang unang mga board of directors sa PEMC alang sa usa ka tuig nga transisyon ug apil si Laniba sa na-appoint.
Nagtuo si Laniba nga laing yugto sa iyang karera ang maong disposasyon ug mapasigarbuhon kini nga dili lamang niya girepresenta ang Visayas apan apil usab ang syudad sa Tagum sanglit dinhi siya gikan ug nagsugod isip kanhing OIC-General Manager sa Davao del Norte Electric Cooperative, Inc. (Daneco).
Nailhan siya sa Davao del Norte isip Catholic faith defender, politiko (nakaserbisyo isip Barangay Kapitan sa poblasyon sa siyudad sa Tagum ug konsehal sa Barangay Apokon), magdibuho, karatedo black belter, manunulat, kolumnista ug author sa pipila ka mga libro nga gipublikar sa lokal.
Sa pagsalmot niini sa pipila ka mga kontrobersiya sama sa kaguliyang sa DANECO, nagatuo si Laniba nga ang iyang mga kasinatian nakatabang kaniya nga mamahimong mas maayong tawo ug general manager alang sa Leyte Electric Cooperative III didto sa Visayas nga maoy misapupo ug miila sa iyang kapasidad.
Isip board sa PEMC, misaad kini nga iyang iduso ang isyu ug katungod sa yanong konsumante sa elektrisidad pinaagi sa pagprotekta niini gikan sa taas nga taripa sa elektrisidad.
“The honor is mine and I never hesitated in taking this chance to represent the people and be a responsible ‘soldier of light ‘not just for LEYECO III but for all the electric cooperatives in the country," sulti niini dihang gikahinabi.
Ang PEMC Election unang lakang alang sa Wholesale Electricity Spot Market (WESM) aron mamahimong Independent Market Operator (IMO). (Domsy Ramos)