Task Force Davao checkpoints palig-unon

(File Photo)
(File Photo)

GIBUTYAG sa Task Force Davao (TFD) nga ilang palig-unon ang ilang presensiya sa ilang mga checkpoints sulod sa Davao City, uban ang gipatuman nga gun ban sa nagkaduol nang Barangay and Sangguniang Kabataan elections (BSKE).

Gikanayon ni TFD Commander Colonel Darren E. Comia nga ilang gipalig-on ang ilang presensiya sa daghang mga checkpoints, ilabi na sa entry points sa dakbayan, subay sa nagpadayon nga BSKE nationwide gun ban.

Matud ni Comia nga ang iyang tropa nagpakusog sa ilang presensiya sa 57-kilometros nga baybay sa dakbayan ug bisan sa Davao River, sa tinguha nga masusi ang mga bangkang de motor ug uban pang sakayan gikan sa ilegal nga materyal atol sa gun ban ug sa mga ilegal nga druga.

“Naglagay din tayo diyan ng isang checkpoint diyan sa gitna ng Davao River nang sa ganun macheck lahat ng bangka na pumapasok ng Davao city para walang makapasok na illegal na kargamento at mga kontrabando,” butyag ni Comia sa paghinabi kaniya sa Davao City Disaster Radio, Septyembre 25.

Nakahisgut ang opisyal sa Task Force uban ang puwersa sa naval sa Mindanao ug Bureau of Customs, human nadakpan ang usa ka sakayan nga nagkarga og giingong ilegal nga sigarilyo sa baybayon sa Bunawan, Davao City karon lang bulana.

Ang taho gipaambit sa mga tigbalita nga nagkanayon nga ang bangkang de motor nidunggo sa Minterbro, Barangay Ilang, Davao City niadtong Septyembre 25, nagkarga og kontrabando nasakmit sa mga operatiba gikan sa TFD ug sa BOC-Davao.

Ang maong bangkang de motor nga gikan sa Bangsamoro Autonomous Region in Muslim Mindanao region, nakitang nagkarga og esmagol nga sigarilyo.

Sa dihang gisusi, nasakmit sa mga awtoridad ang kinatibuk-ang 1,152 kahon sa pinalusot nga sigarilyo, nga dunay gibanabana nga kantidad nga P28.8 million. Trese sab ka mga pasahero ug tripolante nga sakay niini kinsa kasagarang molupyo sa Basilan, Zamboanga, ug Davao City, gidakop sab.

Tungod niini, gipasalig ni Comia sa Dabawenyos nga ilang mga checkpoints lig-onon alang sa mas malinawong eleksiyon ug ang pagpuyo sa dakbayan.

Ilawom sa Commission on Elections (Comelec) Resolution No. 10918, nga gipagawas niadtong Mayo 17, 2023, mga sumbanan bahin sa pagdili sa bagbitbit, pagbiyahe og mga armas o makamatay nga hinagiban ug ang pagpatrabaho, pagpahimulos sa serbisyo sa sa security personnel o bodyguards panhon sa eleksiyon.

Apil ang Philippine National Police (PNP), Armed Forces of the Philippines (AFP), ug ang Philippine Coast Guard (PCG) nagmuntar og Comelec checkpoints sa tibuok nasud.(ICE)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph